240 na ang mga patay sa ’Ondoy’

MANILA - Mga awtoridad nabalaka na sab kay posibleng maigo na sab ang nasod sa laing bagyo samtang misaka na ngadto sa 240 ang nangamatay sa bagyong Ondoy.

Matod sa mga forecaster sa panahon nga laing bagyo nga naporma sa Pacific Ocean mosud sa kadagatan sa Pilipinas ug hayan mag landfall ugma sa Luzon gihapon, sama sa bagyong Ondoy.
Sun.Star accepts donations for victims of Typhoon Ondoy
Grabe ang epekto sa bagyong Ondoy kay ang usa ka buwan nga uwan gibundak man sud lang sa usa ka adlaw, hinungdan nga gibahaan ang 80 porsyento sa Metro Manila niadtong Sabado.
Gibana-bana sa mga awtoridad nga 2.34 bilyunes pesos ang danyos sa bagyo.
Mokabat sa 1.8 milyunes ka mga tawo ang apektado ug 370,000 ang niabandonar sa ilang mga balay ug ningdangop sa evacuation centers.
Gidaghanon sa nangamatay gipaabot nga mosaka pa kon moabot na ang mga report gikan sa hilit nga mga dapit.
“For casualties, the increase will be not as great, but the damage figures may increase,” matod ni Defense Secretary Gilbert Teodoro sa usa ka news conference.
Mga rebeldeng komunista ningpahibawo og ceasefire tali sa kasundalohan sa kagamhanan ug nimando sa ilang ginsakpan sa pagtabang sa flood relief operations.
Ang katawhan ug volunteer groups sa nagkadaiyang mga dapit sa nasod nagtigom og mga hinabang, sagad mga senina, mainom nga tubig ug medisina.
Dunay mga tawo mingbukas sab sa ilang balay nga kapuy-an niadtong nangabiktima sa baha ug ningbiya sa ilang mga balay.
Mga sundawong Kano sa Mindanao gidala sa Manila aron motabang sa relief operations, samtang ang United Nations ningpahibawo nga manghatag silag hinabang nga pagkaon ug cash alang sa medical assistance.
Mipadala sab silag usa ka helicopter ug lima ka rubber boats.
Mga opisyal nanawagan sa international community kay hayan di paigo ang resources sa kagamhanan, labina kon moigo na sab ang laing bagyo.
Naluwas sa kasundalohan, kapulisan ug volunteers ang labing minos 12,359 ka mga tawo, apan matod ni Teodoro duna pay mga tawo nga madugangan ang gidaghanon sa mga patay.
Gideklarar sa kagamhanan ubos sa state of calamity ang Metro Manila ug 25 ka mga lalawigan nga nangaigo sab sa bagyo.
Lakip sa nangatanggong sa bagyo mao ang seksing aktres nga si Cristine Reyes ug iyang pamilya, kinsa giluwas sa aktor nga si Richard Gutierrez. (AP/Internet)